“Kjo është prova ime e dytë dhe ndihem e sigurt, çdo do të shkojë mirë”. Kështu është shprehur Hersi Matmuja, pak para provës së saj të dytë dhe të fundit, në prag të netëve finale të Festivalit Europian. Menjëherë më pas, performanca vokale e Hersit është cilësuar si e shkëlqyer.
Sot, po ashtu janë zbuluar edhe veshjet e ekipit shqiptar që do të na përfaqësojë në Eurovision, ku mbizotëron ngjyra e argjendtë. Gjatë performancës së saj, Hersi do të jetë e ngjitur në një piedestal, do shoqërohet në ekranin e madh nga një qiell me re dhe efekte tymi.
Hersi Matmuja përfaqëson Shqipërinë në “Eurosong 2014” në Kopenhagen, Danimarkë me këngën ‘One Night’s Anger’. Këngëtarja u shpall fituese e edicionit të 52-të të Festivalit të Radio Televizionit Shqiptar.
“Zemërimi i një nate” është titulli i këngës me vargje të Jorgo Papingjit, që është regjistruar në një nga studiot më të mira greke duke u përshtatur në versionin anglisht me titullin “One Night’s Anger”.
