Për shumë njerëz kafeja e mëngjesit me një cigare (ose, thënë më mirë, me disa cigare) është një ritual pa të cilin nuk mund ta imagjinojnë fillimin e ditës. Disa e bëjnë këtë vetë, disa në shoqëri.
Pason pauza në punë: përsëri një arsye për të pirë kafe së bashku dhe, natyrisht, me kafe shkojnë edhe cigaret. Shkuarja pasdite në kafe me shoqëri (nëse këtë ua lejojnë obligimet) – edhe me këtë shkojnë cigaret.
Disi, ata që pinë duhan e kanë të vështirë ta imagjinojnë që me kafe të mos konsumojnë edhe cigare. Megjithatë, do të duhej të paktën të përpiqen të provojnë të imagjinojnë se si do të dukej kjo.
Pirja e duhanit, natyrisht, është një shprehi e dëmshme, dhe për këtë flitet një kohë të gjatë dhe shumë. Në qoftë se mundeni, do të duhej të hiqni dorë nga duhani plotësisht.
Nëse planifikoni që këtë ta bëni dikur në jetën tuaj, por jo tani, ose nuk planifikoni të hiqni dorë nga cigaret, të paktën përpiquni të mos e kombinoni kafenë dhe cigaret, pa marrë parasysh se sa mund t’ju duket e panatyrshme kjo dhe sa mund të mendoni se nuk shkon njëra pa tjetrën. Për çfarë bëhet fjalë?
Hulumtimet e fundit të shkencëtarëve nga Fakulteti i Mjekësisë në Athinë kanë treguar se kafeja dhe cigaret janë një "kombinim vdekjeprurës", respektivisht që konsumi i tyre i kombinuar paraqet një rrezik të rritur dukshëm për zemrën dhe enët e gjakut.
Kafeina në sasi të mëdha, ashtu si edhe nikotina, është e keqe për enët e gjakut, rrit presionin e gjakut dhe rrit rrezikun e sulmit në zemër dhe infarktit. Në efektin e kombinuar të nikotinës dhe kafesë janë veçanërisht të ndjeshëm personat e moshuar, dhe ata që tashmë kanë presionin e lartë të gjakut.
Pse ndodh ky efekt? Shkencëtarët ende nuk janë të sigurt, por besojnë se kjo është për shkak të ndikimit në punën e sistemit nervor qendror dhe sekretimit të hormoneve që ndikojnë në funksionimin e zemrës dhe enëve të gjakut.
Është e mundur që me ritualin e kafesë dhe të cigareve ta lidhni ndonjë kujtim të këndshëm, për shembull, prindërit të cilët e kishin nisur ditën kështu.
Megjithatë, pavarësisht nga asociacionet e bukura dhe pavarësisht nga fakti që të gjithë ne i pëlqejmë disa nga ritualet tona të vogla, ndoshta do të ishte më mirë të hiqni dorë nga ky kombinim - që të keni më shumë kohë për gjëra të tjera, po aq të dashura.
