Policia e Kosovës ka shtuar masat e sigurisë nëpër rrugët e vendit. Si duket kjo është bërë për shkak të aksidenteve fatale që kanë ndodhur këto muajt e fundit nëpër rruggët e Kosovës.
Vetëm gjatë 24 orëve të fundit Policia e Kosovës ka shqiptuar gjithësej 1386 tiketa në trafik. Mirëpo në raportin 24 orësh të Policisë, nuk saktësohet nëse në mesin e këtyre 1386 tiketave të shqiptuara ka edhe këmbësorë të cilëve Policia i ka shqiptuar gjobë për kalim të rrugës në vendet ku është i ndaluar vendkalimi për këmbësorë.
Baki Kelani zëdhënës i Policisë së Kosovës, ka konfirmuar për “Zërin”, se në mesin e këtyre gjobave përfshihen edhe këmbësorët.
“Në mesin e gjobave të shqiptuara nga Policia e Kosovës Brenda 24 orëshit të fundit, përfshihen edhe këmbësorët të cilët nuk kanë respektuar shenjat ekomunikacionit rrugorë”, ka deklaruar Kelani për “Zërin”, duke mos saktësuar se sa ka qenë numri i këtyre gjobave vetëm për këmbësorë.
